فهدالعمدة
عقيد منشاوى
عدد الرسائل : 120
تاريخ التسجيل : 26/06/2008
 | | موضوع: oOoOoOoOoOoO مغامرات "فظيـع" و "فظيعـة" - الحلقة الرابعة OoOoOoOoOoOo الأربعاء يوليو 02, 2008 12:11 pm | |
| "فظيــع" و "فظيـعة"
وهي شخصيات ساخرة أسطورية من المستوى الرابع
تعيش في خيال مؤلفها الغلبان
إللى هو - أنا - أخوكم باسم بدر
هدفها الأساسي في الحياة هو
رسم الإبتسامة على شفاهنا
وغير معروف أي معلومات مؤكده عن حياة
"فظيــع" و "فظيـعة"
مش معروف هما من أي بلد
ولا عمرهم كام سنة
ولا هما متجوزين أو لأ
طيب ساكنين فين؟
برضه محدش عارف
لكن هما كل شوية كده
بيبعتوا تفاصيل لمغامرة من مغامراتهم
عن طريق - العبد لله -
وطبعا كل ما ردودكم كانت مشجعة ليهم
هتلاقوا مغامرات فظيعة جديدة
ويرجى عدم نقل هذه المغامرات خارج المنتدى
فمغامرات فظيع وفظيعة
حصرية لبرامج نت فقط
أرجو من الأعضاء الكرام الإلتزام بذلك
ومغامرتهم الاولى
إسمها
" سـيـادتـك تأكـلي إيـه ؟؟ "
وعلى فكرة دي مقتبسة من موضوع
- والله مش فاكر كنت قرأته فين -
لكنه كان مكتوب باللهجة اللبنانية
وانا بشكر صاحب الموضوع ايا كان مكانه على إلهامى بالفكرة
يعنى القصة : مقتبسة
والسيناريو والحوار : من تأليفي 100 %
ونبدأ الحكـاية
في يــوم من الأيــام
قرر "فظيــع" إنه يعزم "فظيـعة" على الغدا في مطعم من المطاعم الفظيعة
- فيها حاجة دي –
لكن الستات الفظيعة دول ما بيعجبهمش حاجة
شوفوا الحوار وأحكموا بنفسكوا
"فظيــع": تطلبي إيه؟
"فظيــعه": مش عارفة إنت هاتطلب إيه؟
"فظيــع" : أنا هاطلب بيتزا
"فظيــعه": ماشي ، وأنا كمان
"فظيــع": طيب
"فظيــعه": ولا أقولك ، بلاش
"فظيــع": ليه عاوزه حاجة تانية
"فظيــعه": لأ ، مش عارفه
"فظيــع": انتي جعانة
"فظيــعه": إممم ، مش عارفه
"فظيــع": يعني إيه مش عارفة ، أكيد الواحد بيعرف هو جعان ولا لأ
"فظيــعه": نص نص
"فظيــع": يعني أطلبلك معايا
"فظيــعه": لأ
"فظيــع": خلاص
"فظيــعه": ولا أقولك ، يمكن أجوع كمان شوية
"فظيــع": خلاص هاطلبلك وعقبال ما يجي الأكل تكوني جوعتي
"فظيــعه": طيب أفرض لما يجي الأكل أكون لسه ما جوعتش!
"فظيــع": خلاص ، خلي الأكل قدامك ولما تجوعي إبقي كلي
"فظيــعه": ما كده الأكل هايبرد
"فظيــع": خلاص نطلب أكل تاني
"فظيــعه": بس كده يبقى تبذير
"فظيــع": نبقى نأخد الاكل البارد معانا تيك أواي ونبقى نأكله بعدين
"فظيــعه": طيب إفرض ما كان ليش نفس للبيتزا بعدين
"فظيــع": خلاص أكلها أنا
"فظيــعه": وأنا ما أكلش
"فظيــع": جننتيني ، يعني اطلبلك ولا بلاش
"فظيــعه": بلاش احسن
"فظيــع": خلاص أنا هاطلب لنفسي علشان انا جعت جدا
"فظيــعه": ماشي
(لسه "فظيـع" الغلبان هايطلب البيتزا)
"فظيــعه": بس أطلب بيتزا بالتونة
"فظيــع": بس أنا مابحبش البيتزا بالتونة
"فظيــعه": بس أنا بحبها
"فظيــع": بس أنا إللى هاكلها
"فظيــعه": ما يكمن على ما يجي الأكل أكون جعت وأكل معاك
"فظيــع": هو أنتي عاوز تأكلي ولا لأ
"فظيــعه": إحتمال
"فظيــع": يعني أنا لازم أطلب بيتزا بالتونة علشان إنتي (إحتمال) تأكلي معايا
"فظيــعه": أيوه بالظبط
"فظيــع": طيب لو أنتي جوعتي وأكلتي البيتزا بتاعتي أنا هاكل إيه؟
"فظيــعه": ما انا ممكن ما أكلش أصلا معاك
"فظيــع": رحمتك يا رب
"فظيــعه": مالك فيه إيه ؟؟
"فظيــع": يعني دلوقتي لو أنتي ما أكلتيش ، أنا هاكل بيتزا مش بحبها
"فظيــعه": يعني أنت تاكل و أنا ما أكلش؟!
"فظيــع": !!!!!!!!!!!!!!!!!!!!.
.
.
.
---
قررت محكمة الجنايات الفظيعة الإفراج عن "فظيع" المتهم بتهمة
"قتل "فظيعة" مع سبق الإصرار والترصد"
وإعتبار القضية
"دفاع فظيع عن النفس"
---------------
[size=29]ياريت ماتبخلوش علينا بردودكم فظيعة
------
مع تحيات
"فظيـع" و "فظيعـة"
وأخوكم الفظيع
بـاسـم
--------------------------------------
-------------------------------
-------------------------
-------------------
--------------
---------
-----
-
تم إضافة الحلقة الثانية من مغامرات "فظيع و"فظيعة" يوم 10-04-2007
" الحلقة الثانية - البيـت المسكــــون "
-----------
--------
----
-
[size=29]أهلا أعضاء أحلى منتدى في العالم
أولاد وبنـات
طبعا كنا في الحلقة إللى فاتت إتعرفنا على أبطالنا
"فظيع" وفظيعة"
وعرفنا إنهم شخصيات أسطورية
ممكن تكون موجوده في أي زمان ومكان
مش معروف بلادهم ولا اعمارهم
و كل مغامراتهم تعتبر حلقات منفصلة
وكل حلقة ملهاش علاقة بالحلقات إللى بعدها ولا إللى قبلها
مخترع هذه الشخصيات
هو - العبد لله - أخوكم بـاسم بدر
هدف هذه الشخصيات هو
رسم الأبتسامة على شفاه اعضاء المنتدى الغاليين
---------
ونبدأ دلوقتي لقاءنا مع الحلقة التانية من مغامرات
"فظيـع و "فظيعـة"
بعنـوان
"البيت المسكون"
- دستور يا أسيادنا -
- الفكرة الرئيسية للقصة مقتبسة من الأدب الإنجليزي -
في يوم من الأيام كــان "فظيع" و"فظيعة"
قاعدين بيصطادوا في مركب فظيع صغير
على شاطئ بحيرة فظيعة
ساعة ... إتنين ...تلاتة ...
إن سمكة واحدة تعبرهم وتشبك في صنارة أي حد فيهم ... أبدا
قال "فظيع" لـ "فظيعة" : هوه السمك واخد اجازة النهارده ولا إيه ؟؟!!
ردت عليه "فظيعة" : مش عارفه ، يمكن السمك عامل "ريجيم" !!
رد "فظيع" : "ريجيم إيه ؟ عمرك سمعتى عن سمكة عامله "ريجيم" !؟
أظن إن السبب إللى مخلينا قاعدين بقالنا 4 ساعات
من غير مانصطاد ولا سمكة واحدة
هما العيال اللى قاعدين يلعبوا في الميه جنبنا دول
أكيد السمك طفشان من الحته دي بسبب الدوشه إللى هما عملينها
انا هاقوم أزعق لهم ، اليوم قرب يخلص والساعة قربت على 2 الظهر
وشكلنا بعد كل التعب ده هانشترى سمك مشوى جاهز
قام "فظيع" علشان يقول للعيال يبطلوا دوشه
وهو عمال بيفكر في فكرة فظيعة تخليهم يسمعوا كلامه وما يحرجوهوش قدام "فظيعة"
قرب منهم - كانوا 3 أولاد - أكبرهم كان عنده حوالى 10 سنين -
قالهم وهو بيوجه كلامه للولد الكبير : إنتوا عاملين دوشه كده ليه ، ممكن تبطلوا دوشه شويه؟
رد الولد الكبير - بغلاسه فظيعه -: إحنا بنلعب فيها حاجة دي !!
رد "فظيع" : إنتوا مش عارفين إن البيت إللى هناك ده
- وشاور على بيت في الناحية التانيه من البحيرة -
مسكون بعفريت مش بيحب الدوشه
رد الولد الكبير : عفريت إيه ؟ إحنا مسمعناش إن فيه عفاريت هنا قبل كده!!
قاله "فظيع" - وهو بيحاول يفكر في أحداث مقنعة للقصة - :
الحكاية أن صاحب البيت ده - الناس بتقول عليه - إنه كان مجنون
وكان عنده 3 أولاد - في سنكم كده تمام - وكانوا دايما بيعملوا دوشه
وفي يوم من الأيام ، كان اولاده عاملين دوشه جامده قوى
راح ماسك - شاكوش - كبير وكسر لهم دماغهم واحد واحد
وبعدين لما اكتشف إنه قتل اولاده
إنتحر ونط من فوق البيت
ومن يومها والبيت مسكون بعفريت الراجل ده
و أي ولد بيعمل دوشه قريب منه
بيجي عفريت الراجل ده ويكسر دماغه بالشاكوش
رد الولد الكبير - بغرور- : دي قصص خياليه ومفيش حاجة إسمها عفاريت؟
وتدخل أخوه - إللى عمره يجي 8 سنين - في الكلام : صحيح مفيش حاجة إسمها عفاريت ، دي خرافات ..
قال "فظيع" - وهو بيفكر في فكرة شريرة - :
أنتوا بس بتقولوا كده علشان إنتوا بعيد عن البيت
لكن لو رحتوا هناك هتخافوا وكلامكم هايتغير
رد الولد الكبير - بعند طفولى - :
لأ طبعا ، انا متأكد إن مفيش حاجة إسمها عفاريت
ومستعد أروح معاك لغاية هناك علشان أثبتلك إنى مش خايف
سأل أصغر ولد فيهم - واللى ماكملش لسه 5 سنوات - :
هوه يعنى إيه عفاريت؟
"فظيع" قالهم : ماشي ، وأنا جاي معاكوا ، و ها نشوف ها تخافوا ولا لأ ..
بس ثانية واحده اقول لـ "فظيعة" إنى جاي معاكم
ورجع لـ "فظيعة" وحكالها بسرعة الحكاية إللى هو ضحك بيها على الأولاد
وقالها دي أحسن طريقة علشان نخلص بيها منهم ، وننتقم منهم
وقالها: الخطة كالتالى انا هامشي مع الاولاد من حوالين البحيرة
وإنتى تسبقينا بالمركب من وسط البحيرة وبكده هاتوصلى قبلنا
وتدخلى البيت وتستنى جوه واول ما آجي انا والاولاد
تفضلى تعملى شوية أصوات مرعبة علشان نخوفهم
قالتله "فظيعة" : بس انا خايفة !!
قالها: خايفه من إيه ؟ إنتى صدقتى ولا إيه
دي قصة أنا مخترعها علشان اخوفهم بيها
والبيت ده مفيش حد ساكن فيه من زمان
هو صحيح إنى سمعت إن فيه سكان جدد إشتروه
بس هم لسه ماسكنوش فيه
ياللا إعملى زي مابقولك وماتخفيش
ورجع "فظيع" تاني للاولاد وقالههم : هه ، جاهزين
قالوا في صوت واحد : جاهزين
----------------
مشى "فظيع" مع الاولاد من حوالين البحيرة لحد ما وصلوا البيت
البيت فعلا كان شكله قديم ومرعب
قرب "فظيع" من الباب وفتحه بهدوء والأولاد ماشيين وراه
طبعا صوت الباب كان مزعج جداً - يدل على إنه ما إتفتحش من مدة طويلة
دخل"فظيع" والاولاد البيت
والضلمة إللى جوه البيت
والشقوق إللى في سقف البيت وأشعة الشمس إللى داخله منها
خلت جو البيت فعلا مرعب
شوية وراح سألهم : هاه ، لسه مش خايفيين
رد الولد الكبير : لأ ، مش خايفيين
وفجـــــأة
سمعوا صوت جاى من الدور إللى فوق
عاوووووووووووو
وسمعوا صوت شاكوش عمال يخبط بشكل مخيف في السقف
قالهم "فظيع": ده عفريت الراجل المجنون ، جاي بالشاكوش بتاعه علشان يكسر دماغكم ، ياللا إهربوا بسرعة
طبعا الولاد طاروا من باب البيت وهم مرعوبين وماسكين دماغهم وعمالين يصرخوا
وطبعا "فظيع" وقع على الأرض من كتر الضحك على المقلب إللى هو عمله فيهم
طلع "فظيع" الدور التاني علشان يهنيء "فظيعة"
بنجاح خططهم الفظيعة الإنتقاميه الشريرة
لاقى في الدور التانى اوضه واحدة كبيرة
فتح الباب لاقى "فظيعة" قاعده في ركن الاوضه
قالها: كان نفسي تشوفى شكل العيال وهم بيجروا وخايفين
بس بجد إنتى عبقريه فكرة الشاكوش والخبط دي كانت أحسن حاجة عملتيها
مع أنى نسيت أقولك عليها
قالتله : شاكوش إيه ، وخبط إيه ، هو مش إنت إللى كنت بتخبط بالشاكوش ؟؟!!
قالها : يعنى إيه ، إنتى قصدك إنك مش إنتى إللى كنتى بتخبطى بالشاكوش ؟؟!!
قالتله: لأ ، انا سمعت الخبط زيك تمام ، وكنت فكراك إنت إللى بتخبط !!
قالها : يعنى إيــ....؟؟!!
(وقبل ما يكمل كلامه)
سمعوا صوت باب البيت بيتفتح
وبعدين سمعوا أصوات رجلين طالعه على السلم ببطئ مرعب
طبعاً مش عارف أوصفلكم شكلهم بقى عامل إزاى
وهم - متكومين - في ركن الأوضة
وبيترعشوا من الخوف
وبيقولوا في نفس واحد :
عفريت الراجل المجنون
عفريت الراجل المجنون
عفريت الراجل المجنون
.
.
.
وفجأة إتفتح باب الأوضه
وكان أي حد معدى في الشارع على بعد 2 كيلو
ممكن يسمع صوت دقات قلوبهم وهي بتدق جامد
لما شافوا مين إللى فتح الباب
راجل طويل عريض
شعره منكوش
وهدومه مليانه تراب
وماسك في إيده شاكوش كبير
.
.
.
.
--------------
في مستشفى الأمراض العقليه الفظيعة
قسم حالات الفزع الفظيع
---------
كان واقف الدكتور قدام سرير "فظيع" و"فظيعة"
وجنبه ضابط الشرطة عمال يزعق للراجل - إللى كان ماسك في إيده شاكوش -
ويقوله: إنت عملت فيهم إيه علشان يحصلهم كده ؟؟؟!!
رد عليه الراجل - ابو شاكوش-:
"يا باشا انا نجـار غلبان والراجل صاحب البيت الجديد
جابني علشان اصلح الكسور إللى في سقف البيت
وأنا شغال في أمان الله
لاقيت 3 اولاد طالعين يجروا من باب البيت وقاعدين يصرخوا
نزلت أشوف فيه إيه ، لاقيت الإتنين دول قاعدين في ركن الأوضة
بيصرخوا ومرعوبين كده ، رحت إتصلت بالإسعاف
بس يا باشا ، هو ده كل إللى حصل "
----------
بص الضابط لـ "فظيع" و"فظيعة"
وسأل الدكتور :
هما عندهم إيه يا دكتور؟؟!!
بص الدكتور على "فظيع" و"فظيعة"
وهما نايمين على السرير
و لسه بيترعشوا من الخوف
- وطبعاً كان نفسي يكون معايا كاميرا في اللحظة دي -
علشان اصورهم وأحطلكم صورتهم
علشان تشوفوا شكلهم بقى عامل إزاى
وهم وشهم بقى لونه ما بين الأصفر والاخضر والبنى الغامق
وشعرهم زي ماتكون ضربت فيه كهربة بقوة 20 ألف فولت
وهـز رأسه بحسرة ، وقاله :
"والله اللى حصلهم ده ، ولا كأنهم شافوا عفريت قدامهم "
وطبعا هو ما يعرفش قد إيه إن كلامه ده كان
" مضبوط جداً "
--------
ياريت تكون القصة الفظيعة دي عجبتكوا
وياريت اشوف ردودكم الفظيعه منوره الموضوع
-----
وتقبلوا تحيات "فظيع" و"فظيعة"
من مستشفى الأمراض العقليه الفظيعة
--
وإلى اللقاء في مغامرات فظيعة اخرى
[/size] | |
|
